# GEME'S # GERAKAN EDUKASI MASYARAKAT SUNDA URANG SUNDA WAJIB MELESTARIKAN BASA INDUNG

Ku: Eulis. H. Saputra

(KACI/ PATREM/GEME'S)

"Utamakan Bahasa Indonesia

Lestarikan Bahasa Daerah

Kuasai Bahasa Asing"

Ieu teh mangrupa hiji slogan minangka sikep basa, nu diembarkeun minangka papayung ti Pusat Pembinaan Bahasa dan Sastra Kementrian Pendidikan Kebudayaan Riset dan Teknologi.

Slogan nu matak mincut, umajak sakumna panutur basa sa-Indonesia sangkan ulah asa-asa make basa luyu jeung kamampuhna. Daria tur reueus bisa silaturahmi kalayan hade, bener tur sigep ngalarapkeun potensi basa nu dipimilikna dina gunem catur pakumbuhan boh di lingkungan kulawarga sumawonna di lingkungan  masarakat.

Pupujuhkeun basa Indonesia

Mumule basa daerah

Cangking basa deungeun

Eta tilu sikep motivasi berbahasa dibeungkeut ngahiji sangkan jadi kompetensi nu kudu dipibanda sakumna rakyat Indonesia. Nu geus diwewegan ku undang-undangna. Aya palanggeran nyata nu netelakeun  ngeunaan kalungguhan basa Indonesia, daerah, jeung  basa deungeun.

Di Jawa Barat, basa Sunda jentre pisan direngkolkeun dina Perda Jawa Barat No. 14 tahun 2014. Nu netelakeun perobahan Perda No. 5 Tahun 2003 Basa, ngeunaan Pemeliharaan Bahasa, Sastra jeung Aksara Sunda.

Kalungguhan Basa Sunda minangka basa daerah, jadi ciri masarakat Jawa Barat  Minangka basa resmi keur komunikasi pikeun sasama panyatur basa di wewengkon Jawa Barat, khususna keur urang Sunda. Basa sapopoe nu sah dipake pikeun kagiatan formal, nonformal, atawa informal.

Tanggal 21 Februari geus ditetepkeun ku UNESCO minangka poe basa Indung sa-dunya. Rebuan basa Indung nu masih hirup hurip di masarakat  panyaturna dina poe ieu sawadina diramekeun. Ubyag  dipake dimamana ku sewang-sewang kulawarga. Boh sacara lisan atawa tulisan, dina rupa-rupa media komunikasi. Jati jajaten walagrina basa. Henteu hamham atawa asa-asa, komo era mah.

Poe ieu, Senen 21 Februari 2022, marengan mieling Poe Basa Indung sa-Dunya. Bisa jadi poe kareueus keur sakumna warga Jawa Barat, hususna urang Sunda.

Poe basa Indung, sakaligus bahan tafakureun keur sarerea. Naha enya masarakat Jawa Barat galecok gunem caturna ku basa Sunda? 

Basa teh apanan ciciren bangsa. Leungit basana, tangtu leungit budayana. Sabab budaya bangsa katangen dina budaya basana.

Pagedugna antar budaya dina jaman teknologi mesat ngajomantara, bisa jadi syiar basa.  Silih wanohkeun istilah nu bisa jadi pangreureuah ngajembaran kabeungharan kecap dina kancah komunikasi antar suku bangsa jeung nagara.

Teu aya nu mustahil upama bisa silih serep. Apanan basa mah sifatna arbitrer, mana suka. Salila dipikaharti, luyu jeung budaya bisa silih wanohkeun keur tumaninahna komunikasi.

Kamekaran basa Sunda bisa euyeub ku rupa-rupa istilah. Motekar pikeun make basa Sunda bisa dipaluruh  tina budaya nu aya di Jawa Barat. Sanajan henteu unggal kulawarga miboga kamus basa Sunda teu matak ngurangan jiwa merdeka keur nguniangkeun rasa Sunda.

Istilah-istilah kasundaan nu geus carem bisa diguar deui, dihirup huripkeun deui, diwaranohkeun deui. Utamana dipatalikeun jeung kamekaran zaman, kitu deui dina istilah teknologi, atawa paelmuan liana.

Perumahan nu jlug-jleg anyar diwangun di tatar Jawa Barat bisa payus merenah mun tetep dingaranan luyu jeung alam Jawa Barat, atawa sajarah budaya nu aya di Jawa Barat. Hal nu ieu mah bisa dipaluruh, disarungsum ku rupa-rupa kasangtukang hasil budaya Jawa Barat.

Istilah kasundaan jadi gengsi mandiri nu bisa karasa keur letah urang Jawa Barat hususna. Umumna keur sakabeh warga Jawa Barat.

Teu semet eta, 21 Februari jadi totonden keur urang sarerea. Mularasa basa teh geuning sakitu babarina, asal daek jeung wani ngucapkeunana. Sabab, unggal jalma miboga kamampuh keur mibanda leuwih ti dua basa. Boh kamampuh dina make basa daerah, atawa basa deungeun.

Pertanyaan nu jadi panganteur mapag poean poe basa Indung sa-dunya.

Jawa Barat  galecok madungdengkeun basa Sunda atawa urang Sundana?

Naha madungdengkeunana ku basa Sunda?

Matak gemes mun basa Sunda bisa ngainternasional teh.

Gemes mun bisa ngadumaniskeun, atawa ngolaborasikeun sababaraha basa jadi kabeungharan kecap anyar nu merenah tur hade. Payus tata titi etikana katut leleb rasa basana.

Gemes hayang urang Sunda bisa marake basa Sundana kalayan bener tur merenah

Gemes hayang ngadangu basa Sunda  dipikawanoh deui ku nonoman Sunda

Gemes basa Sunda nguniang ngagalindeng dina lagu-lagu kaheman

Gemes basa Sunda jadi andelan di unggal kagiatan masarakat, sakola, kantor jeung pamarentahan.

Gemes ka urang Sunda nu nyunda.

#SABISA-BISA KUDU BISA#