BALIKKEUN DEUI KULTUR KANA KODRATNA

Ku Yadi Triyadi

(Tendik SMAN 1 Cisayong Tasikmalaya)

Wanci pasosore kuring ngalangeu di tepas imah, ngalamun kosong. Panon poe lingsir ngulon, mayapada ngagebray dipapaes ku katumbiri. Angin ngadalingding muka lalangse carita nu hamo laas kalindih ku mangsa. Pipikiran jadi baluas, ras inget keur zaman bangor, nalika sakola di Sakola Dasar (SD). Di Cisayong padumukan kuring tempat ngaji diri lemah cai kabanggaan.

Kuring dididik ku panyarek jeung paneunggeul. Baheula mah rarasaan teh asa teu adil, di mana aya kasalahan leutik pasti beunang ku panyarek kolot, angot lamun kasalahan na gede mah geus pasti panggebug nyasar kana bitis. Tapi ku lantaran eta meureun nu matak kuring apal kana adab jeung tatakrama. Ti leuleutik kuring diatik pikeun ngajenan ka saluhureun, mikaheman ka sasama, tur mikanyaah ka sahandapeun.

Hampurana ka “generasi android”, rumasa kuring rada nyindiran. Da bongan aranjeun katungkulkeun teuing ku gaya hirup bari jeung teu dibarengan ku tatakrama. Sakola tapi teu nyakola. Conto leutik, adab-adaban ngahormat ka saluhureun, nu baheula mah aya budaya ‘sun tangan’, kiwari dirobah jadi ngarawu leungeun laju ‘dijedakkeun’ kana pipi atawa kana tarang. Ieu adab-adaban duka di mana atawa iraha robahna?

Lantaran kuring aya di lingkungan atikan, hal ieu mungguh sok jadi bangbaluh, kumaha ngaihtiaran nana sangkan bisa malikkeun deui tatakrama warisan kasopanan urang Sunda. Kuring oge rumasa yen kuring mah lain jelema bener. Ti keur budak oge kawentar jalma bangor, jajauheun kana picontoeun mah. Tapi lamun nitenan kaayaan barudak android zaman kiwari, sok ngarasa cikeri, najan teu sakabehna kitu. Barudak zaman kiwari mah sigana teh geus parohoeun kumaha kuduna uluk salam, sok komo hayang paheula-heula nyium panangan anu jadi guruna. Padahal eta pisan jalan keur jembarna elmu nu keur disuprih di sakola.

Di mana aya nu salah, mudah-mudahan aya nu ngageuing. Nya kuring oge nemprakkeun ieu kahariwang teh dina raraga silih elingan. Silih geuing nalika aya lampah anu salah, oge sikep anu kurang tumaninah. Dirojong pangdu’a, mugia Alloh nyubadanan kana sagala tarekah urang dina ngajegkeun adab tur tatakrama urang Sunda anu leket jeung tungtunan agama islam. Hayu urang naratas deui jalan pikeun nanjerkeun budaya sinareng tatakrama Sunda. Hirup silih ajenan jeung sasama, hormat ka saluhureun, mikanyaah ka sahandapeun. Sim kuring yakin yen ku upaya sabilulungan mah, sagala masalah oge pasti bisa katungkulan.

Hapunten nu kasuhun bok bilih aya cariosan anu garihal tur teu merenah dina nempatkeunana, mugia jembar pangampura…, cag!

Cisayong, Rewah katompernakeun