KUDU WIJAKSANA DINA NGAGUNAKEUN MÉDIA SOSIAL

Ku M. Muhsin Sirojul Munir, S.Pd.

(Guru SMA Negeri 1 Mégamendung)

Dina kahirupan kiwari, urang geus teu bireuk deui ka nu ngaranna internét. Kusabab, internét bisa diaksés dimana waé, cukup ku ngamodal HP anu ngabogaan konéksi internét atawa cukup ku ngamodal duit sababaraha rébu pikeun ngeusian kuota, urang geus bisa ngagunakeun internét, malah ayeuna mah loba tempat-tempat anu nyadiakeun aksés wi-fi. Ayeuna mah teu di kampung teu di kota, teu kolot teu budak geus bisa ngoprasikeun internét sarta kairut ku nu ngaranna internét. Katambah ku ayana aplikasi- aplikasi média sosial kayaning; facebook, whatsApp, line, twitter, instagram, jeung sajabana. Jalma-jalma beuki kairut pisan, malah loba jalma anu kacanduan ku nu ngaranna média sosial.

Ku ayana média sosial tangtuna waé urang kudu wijaksana jeung bener ngagunakeunana, sabab lamun urang teu bener ngagunakeunana tangtuna waé loba hal-hal négatif nu nyangkaruk di média sosial éta sorangan. Contona waé pikeun para rumaja mah bisa nyalah gunakeun fasilitas média sosial minangka sarana kriminalitas atawa asusila ku cara ngirim situs-situs, gambar-gambar, atawa video-video anu teu sawajarna. Nu mana bisa ngaruksak moral para rumaja nu mangrupa sirung bangsa. Salian ti éta, sisi negatif tina média sosial téh diantarana; kacanduan nepikeun ka poho kana sagala rupa jeung bisa katipu ku iklan-iklan dina média sosial nu teu puguh juntrunganana.

Upama urang wijaksana jeung bener dina ngagunakeun média sosial tangtuna waé urang bisa meunang informasi tina média sosial kalawan sakedét nétra. Média sosial bisa dipaké pikeun média anu pangéfektifna sarta gampang diaksés dimana waé jeung ku saha waé, malah média sosial téh bisa ngabantu para rumaja hususna dina widang atikan, contona; média sosial bisa jadi sumber informasi jeung komunikasi anu lengkep pikeun pangajaran di sakola, bisa néangan informasi anu up date ngeunaan pelajaran-pelajaran sakola dibanding ngan saukur diuk cicing ngaregepkeun guru nerangkeun, bisa patukeur informasi jeung babaturan ngeunaan palajaran di sakola bari jeung teu papanggih langsung, bisa nambahan élmu pangaweruh ngeunaan sagala hal anu teu diajarkeun di sakola, sarta mantuan ngaréngsékeun pasualan-pasualan nu sok aya dina dunya atikan.

Tina pedaran-pedaran di luhur, nya geus sawadina urang salaku rumaja kudu bisa wijaksana dina ngagunakaeun fasilitas média sosial. Gunakeun média sosial pikeun kapentingan élmu pangaweruh atawa pikeun nga-up date informasi anu kawilang penting, poma ulah ngagunakeun fasilitas média sosial nu bisa ngaruksak moral.

Aya jalma nu kasingsal

Tangkal cau deukeut pager

Paké média sosial

Kahadé sing bener-bener

Cag…!