MIÉLING POÉ BASA INDUNG INTERNASIONAL

Ku Bambang Wibowo, S.Pd.

(Guru SMKN 1 Cikalongkulon)

Naon nu disebut basa indung téh

Nurutkeun Kamus Besar Bahasa Indonésia, nu disebut basa indung téh nya éta basa nu pangmimitina dipikabisa ku hiji manusa, ti mimiti gubrag ka alam dunya nepi ka dipaké interaksi jeung masarakat séjénna. Pangabisa kana basa éta teu bisa leupas tina pangaruh kulawarga jeung jalma di sabudeureunana. Basa indung nya éta basa di hiji wewengkon atawa basa nu diajarkeun ku kolot ka anakna.

Lamun hiji jalma lahir jeung gedé di lingkungan suku Sunda, nya basa Sunda nu diajarkeun pangmimitina ka manéhna. Sanggeus bisa basa Sunda, tuluy diajar basa Indonésia jeung basa asing séjénna pikeun interaksi boh jeung lingkunganna dina séktor informal atawa dina séktor formal siga sakola.

Satutasna dikukuhkeun poé basa indung dina kaping 21 Pebruari jadi poé basa indung Internasional. Sakuduna urang salaku pituin urang Sunda sangkan bisa ngamumulé tur ngamekarkeun basa jeung budaya Sunda.

Ninggali kaayaan ayeuna basa Sunda geus jarang digunakeun dina kahirupan sapopoé, utamana ku siswa alesanna nya éta lantaran ngarasa éra, géngsi atawa sieun disebut henteu gaul atawa kampungan. Ku ayana miéling poé basa indung internasional dipiharep bisa jadi tarékah pikeun ngajaga jeung ngariksa basa katut budaya Sunda utamana di lingkungan sakola.

Pikeun ngajaga jeung ngariksa basa Sunda kudu dilakukeun sababaraha tarékah nu biasa dilakukeun dina kahirupan sapopoé. Upamana waé dina saminggu di média sosial “update status” atawa méré koméntar kudu ngagunakeun basa Sunda atawa dina saminggu siswa “puasa’ maké basa nanaon iwal ti maké basa Sunda. Kudu percaya diri nyarita maké basa Sunda. Salian ti éta sakola bisa ngayakeun acara pikeun ngareuah-reuah miélingna poé basa indung internasional di antarana ku cara ngayakeun seminar basa Sunda, upacara adat, jeung mintonkeun kamonésan anu aya patalina jeung basa katut budaya Sunda.

Mang anda keur ngecrik hurang

Di basisir telu angké

Basa Sunda basa urang

Wajib ku urang di paké

Néng Isah sareng Téh Tati

Tatanggan jeung Bi Ina

Lamun basa dipupusti

Nya kudu reujeung makéna

Jalan-jalan ka gang Sunda

Naha bet meni nalangsa

Kuring téh pituin Sunda

Bakal ngamumulé basa

Dulur-dulur hayu urang ngajaga jeung ngariksa basa katut budaya Sunda, lamun lain ku urang ku saha deui. Kudu reueus nyarita maké basa Sunda lantaran basa mangrupa cicirén hiji bangsa.

”Leungit basana, ilang bangsana

Bangsana nanjung, basana linuhung

Sunda apanjang-apunjung”

Hurip Sunda!

Cag!