MIKAWANOH WANCI SUNDA

Ku Yunar Festovik

(Guru Basa Sunda SMKN 1 Cikalongkulon)

Hirup teh estuning katungkul kuwaktu, malah dina ajaran islam mah wal’asri teh demi waktu demi wanci, tah ieu demi waktu,waktu dina basa sunda henteu cukup ku jam kolot baheula mah, da keur jaman can aya jam, ayuena mah gampang,jam sabaraha ieu teh? Jam salapan leuwih sapuluh,umpamana,jam sabarah ieu? Jam sabelas kurang saeutik, bisa, jaman baheula keur can aya erloji, urang sunda mah sok make tangara waktu teh ku ciciren lingkungan alam, umpamana wae dina basa sunda waktu sapoe sapeuting, dimimitian ku wanci tengah peuting, ngandung harti bagantina antara tanggal ka poe. Tengah peuting mimitina jam 00.00 nepika jam 00.30, tidinya maju ka wanci tumorek, maksudna tumorek teh geus teu kadenge sora nanaon, sepi jempling, keur meujeuhna jalma talibra sare ngaguher kerek nyegrek, wanci tumorek dimimitian ti jam 00.30 nepika jam 01.00, terus maju ka wanci janari sapi dimimitian ti jam 01.00 nepika jam 01.30 kuanaonna pangna disebut wanci janari sapi cenah dina jam sakitu sapi teh sok disarada marenta parab, tidinya maju deui ka wanci janari leutik, keur meujeuhna tiris-tirisna, gening sok aya babasaan samodel kieu, wanci janari leutik budak ngulisik, kolot oge milu ngulisik, tah duka teuing rek naon ngulisikna mah, tapi da moal mungkin ngulisik terus nembok, palebah dinya mah tanyakeun weh ka kolot nu geus rarumah tangga.

Wanci janari leutik dimimitian ti jam 01.30 nepi ka jam 02.00. tidinya maju kana wanci balebat, balebat teh anu sok ngembat-ngembat bray-bray caang beulah wetan, tapi can caang nyaan, cenah jaman sangkuriang kabeurangan dayang sumbi teh meberkeun kaen anu ditinun, brat-barabat nepika jiga balebat, anu cahayaan rayrayan caang tapi encan, waktuna di mana pajar geus udat sinar panon poe geus mimiti rek nembongan kira-kira tabuh 04.30, tah tina balebat maju kana wanci carancang tihang geus mimiti tihang-tihang imah teh katingali.

Wanci carancancang tihang teh liwat pajar titingalian remeng-remeng keneh waktuna 04.30 nepika jam 05.00. Tidinya maju ti tabuh 07.00 nepika tabuh 08.30 disebutna wanci haneut moyansok ngeunaheun dipake moe tonggong dina wanci haneut moyan mah. Tina wanci haneut moyan maju ka wanci rumangsang dimana panon poe mimiti karasa panas, rumangsang asal kecapna tina rangsang make sisipan –um lamun ceuk bahasa indonesiana mah merangsang. Tidinya maju deui kana wanci pecat sawed dimimitian ti tabuh 10.00, pangna disebut pecat sawed cenah dina jam sakitu waktuna munding dilaan sawedna maksudna sina reureuh heula, sawed teh anu aya dina punduk munding.tina wanci pecat sawed maju ka wanci manceran atawa tengah poe, keur meujeuhna panon poe aya dina luhureun sirah, geus asup kana waktu solat lohor. Tuluy maju kana wanci lingsir ngulon dimimitian ti jam 13.00 waktu panon poe geus mimiti ngeser ka kulonkeun.

Tidinya maju deui kana wanci panon poe satangtung dimititian ti jam 15.00, tah dina wanci ieu mah ukuran panon poe teh pas dina tangtungan urang. Tidinya mimiti geus rek surup dina luhureun gunung kira-kira tabuh 16.00-1700 disebutna wanci tunggang gunung,kunaon pangna disebut tunggang gunung lantaran katempona panon poe teh siga anu tunggang gunung, padahal mah eta panon poe teh lain nunggangan gunung meureunan, ngan ampir kahalngan jadi katempona jiga nu tunggang gunung.tidinya mimiti layung katempo beureum kira-kira tabuh 17.00-18.00 disebutna wanci sariak layung.

Tina wanci sariak layung tuluy maju ka wanci sarepna tah lebah dieu geus mimiti reup poek kira-kira jam 18.30, tidinya maju kana wanci sareureuh budak, waktuna barudak reureuh tina sagala aktivitasna kira-kira jam 20.00, tuluy maju deui kana wanci sareureuh kolot, waktuna kolot raruereuh tina sagala aktivitasna kira-kira tabuh 22.00, tuluy dipungkas ku wanci tengah peuting.tah dina jaman kiwari mah wanci sunda teh ampir teu dipikawanoh ku masyarakatna da cenah jaman geus maju, nuduhkeun waktu mah geus teu kudu ningali kana kaayaan, cukup nempo kana jam geus tara katempo jarum jam nuduhkeun kana angka sabaraha. Dina jaman anu sarwa teknologi ieu urang sunda ulah nepika poho kana budayana, Ari banda batur diampihan ari banda sorangan dialungkeun, ngudag kamajuan ge lain hartina poho kana harga diri.