Nyukcruk Galur Naratas Jalan Kahirupan

Ku Dr. Drs. Raya Erwana, M.Pd.

(Praktisi Pendidikan)

Sanajan jauh, ayana di lamping gunung, dijero sagara gé, haté mah tetep tibelat. Tuh diditu, di lembur itu urang pernah ngalalakon basa harita ulin sondah, congklak, galah jeung sabangsana kaulinan budak taun salapan puluhan.

Asana téh kamari kénéh urang ngudag-ngudag meri batur nu ngabrul ngantay di sawah Bah Ata bari ngilikan endog na susuganan aya nu tinggaleun. Atawa isuk-isuk rebun kénéh urang ngabring ka lapang  ngoréhan supa lémbér, supa béas, supa payung tur supa nu nyumputna di jukut lapangan bola cenah mah supa beunteuli.

Teu karasa brul cimata ngaburudul ngabarabay mapay malipir kana pipi. Kamarana atuh babaturan téh? Ayeuna mah geus séwang-séwangna gening.

Batur ngojay di cepotan bari lalangiran. Ngadon papalidan, peupeuntasan di lebah girang bari taya pisan karingrang. Tapi saenyana matak nyangreud pageuh dina lelembutan. Néwakan banawa nu minuhan batu wahangan. Ras mun inget kabayang matak muringkak bulu punduk.

Kamarana ayeuna réncang susumputan nu  ngawates ku ucapan belah wetan kulon kidul jeung kaler? Batur Ngider lembur? Tukang naék tétérékélan teu inggis ku luhurna tangkal, teu sieun ku geberna angin nu ngagelebug, teu sieun ku lampigna gawir nu ngalongkéwang.

Lalakon  urang asa ku panjang. Teu cukup ku sakola isuk, ngarasaan sakola burit gé teu burung di cumponan da kusabab kakurangan kelas nu antukna dibagi dua bagian. Panas teu jadi halangan, komo hujan kalahka atoh babaseuhan. Ngabring akur teu aya gogontokan..

Salam kanggo nu sajaman. Mugi urang tiasa paamprok jonghok patepung deui. Ngadongeng silih tukeur lalakon, bari seuri gogonjakan.

#cibuntutaun90an#

Waas pas maca salah sahiji status Facebook nu ditulis ku salah sahiji siswa nu pernah diajar keur mangsa ngajar keneh di SMP, tilu puluh taunan katukang.

Teh Santi Intan Nurcahya, ngaran nu gampang diinget nepi ka ayeuna,  salian ngaran nu éndah ogé moal matak bisa dipohokeun ka ieu wanoja nu harita keur mejeuhna ligar. Pameunteu nu teu éléh ku artis kota, kulit bodas nyacas, pangawakan campernik, pangpangna mah loba kabisa jeung pinter pisan dina ngalap élmuna.

Wajar anjeunna ngungkapkeun nu aya dina manahna kusabab saumpama ningali tarékahna keur ngarobah nasib, matak miris nu ningali.

Maneuh di hiji lembur nu ngarana Cibuntu, lembur nu ayana di sisi walungan Cimandiri, matak betah nu ningali. Ngan hanjakal memang mangsa harita mah matak susah ngajugjugna ka éta tempat  téh.

Nu singket mah mun rék ka dinya ti pasar Citarik norobos mapay jalan satapak perkebunan karet nu lumayan jauh. Nepi ka sisi walungan Cimandiri meuntas maké parahu leutik bari mayar sakadarna. Bisa waé jalan darat, ngan muter heula ka jambatan Bagbagan terus mapay jalan koral nu nanjak mudun bari loba liang nu ngagudawang.

Tarékahna keur sakola kudu diacungan opat jempol. Meuntas wahangan maké parahu leutik tuluy nikreuh leumpang mapay jalan satapak, nu ahirna dituluykeun naék angkot nepika salokana.

Da kulantaran sakolana teh masih kawatesanan kelasna, sok dibagi jadi dua rombongan. Nu isuk ti jam tujuh nepika jam dua belas, nu beurang ti jam hiji nepika jam lima. Lamun kabagian isuk kudu nyubuh ti imahna, lamun bagian beurang kadang sok kapeutingan di jalan. Malah mah hiji mangsa kasorénakeun pernah kapegung ku caah dendeng, atuh puguh teu bisa ngaliwatan wahangan. Anu antukna mondok di saung perkebunan ogé anu sok dipaké ngiuhan anu rék meuntas. Sapeupeuting bapana ngagorowok mastikeun yén aman kaayaannana.

Téh Santi nuluykeun SMAna di kota di sakola negeri favorit. Nu antukna mah ka paguron luhur di Yogyakarta. Aya harewos bojong ti hiliwirna angin peuting, cenah tos ditikah kudosenna, leres kitu téh Santi? Sok ah ngadongéng deui!

Cigombong, 17/03/23

Sumber carita utama: FB Santi Intan