SUNDA

Oleh Irani Suprianti, S.Pd.

(Guru SMAN 1 Cigombong)

Teu loba nu apal kana kecap Sunda, rata-rata jalma saupama ngadéngé kecap Sunda pasti langsung nerap ngeunaan Suku nu aya di Jawa Barat atawa leuwih kana basana nyaéta Sunda. Saupamana urang ngetik kecap Sunda dina google nu kaluar atawa nu dibahasna ngeunaan suku Sunda, saperti dijelaskeun dina Wikipédia, Sunda atawa Suku Sunda kelompok etnis yang berasal dari bagian barat pulau jawa, istilah nu katelah mah nyaéta tatar Pasundan téa. Sabenerna mah harti Sunda sorangan ceuk dina kamus Basa Sunda meunang karangan R.A. Danadibrata téh cai, bisa ogé dihartikeun kana kecap béngras, caang, jeung cahya dina basa sangsakerta.

Ditingali harti tina Sunda nyaéta cai, matak wajar lamun dina toponimi (penamaan tempat) sababaraha wewengkon, hareupna sok ngagunakeun kecap cai disingget “ci”, saperti Cicurug singgetan tina cai curug, aya deui cibadak tina cai badag, atawa cigombong tina cai gombong. Gombong nu hartina bangsa awi nu gedé pisan sok disebut ogé awi surat. Réa kénéh sabenerna mah wewengkon anu ngagunakeun kecap cai nu aya disakuliah Jawa Barat, pembahasan ngeunaan éta mah kudu khusus kana jalur toponimi nu aya di jawa Barat.

Aya deui istilah atawa kecap Sunda nu remen disebut, saperti kecap nyunda. Naon ari nyunda? Naha béda hartina jeung kecap Sunda? Jelas béda. Kecap nyunda leuwih kana adat istiadat atawa kabiasaan urang Sunda, matak ayeuna mah di lingkungan pamaréntahan Provinsi Jawa Barat aya istilah kemis nyunda, hartina di dinya nyaéta unggal poé kemis téh dipiharep ka sakumna pagawé dina poé kemis ngagunakeun raksukan adat urang Sunda. Kabaya pikeun awéwéna sedengkeun pangsi dipaké ku pagawé lalaki, kusabab pangsi atawa kabaya mangrupa salasahiji di antara adat istiadat kabiasaan urang Sunda baheula dina segi raksukan anu dipaké sapopoé.