Serat Purnama Salira 2 (Rakéyan Sasmita Ati)

Karya: Robby M. Asyidik

“Andaikan kau datang kembali jawaban apa yang kan kuberi,” saur Tonny Koeswoyo nu ngagorowok dina haté, ngorék-ngorék mangsa tumorék. Salambar sajak trésna nu ditulis, yaktos tina manah nu guligah. Salambar kajempling. Sabungkus haté nu simpé. Sagurat gumujeng salira.

Wilujeng wayah kieu, jungjunan. Aya bulan nu moncorong nyaangan sirah nu baluweng. Matapoé nya matapoé nu ngaduruk simpéning ati nepika géhéng. Cika-cika nu baranang nyaangan mongkléng pangimplengan. Sajorélat katumbiri nu nyampai dina ati.

Jungjunan, Salira lir malati nu ligar nuruban ati nu wuwuh tagayur jeung tagayur. Sagelebug angin kareuwas nyérését kana haté. Ngagorowong molongpong, ka ilik, di ilik, ngilikan ukur aya salira nu netep di jero na.

Paamprokan, 2 Oktober 2024