Wengi Asih Nu Harita

Karya: Robby M. Asyidik

(X E 4 SMAN 1 Banjarsari)

Mangsa sareupna aya warta ti salira, nu seja ngajak tepang sisi basisir.

Seja paduduaan, gogonjakan, cumarita, pacantél rasa, ngumbar trésna sasarengan.

Nyakséni éndahna layung nu mayungan sagara.

Mega nu pulas konéng semu beureum kapantul na hérang na sagara.

Najan can kalaksana éndahna kagambar dina pangimplengan.

Hatur punten...

Nalika balébat aya panghalang pikeun patepang.

Panghalang nu kumalayang sapanjang wanci, ti balébat ka sariak layung.

Nanging bagjana warta, yén salira nu seja sumping ka sim abdi.

Sanaos teu ka basisir, tapi urang tiasa tepang paduduaan ka taman ratrikala.

Sumidak na wengi harita nyulusup kana kalbu.

Silih teuteup soca dumadak ieu manah ka tohor ku imut na salira.

Ka salira...

Tuh teuteup béntang-béntang nu gumiwang di awang awang, neras pilari jalan salira.

Nalika ramya soca salira langkung éndah batan purnama, jadi kedah kumaha ieu raga henteu mitrésna salira?

Nalika raga, soca, lan manah, hoyong ningali kaéndahan.

Teu kedah neuteup awang-awang nu awur ku béntang gumiwang, atanapi bulan nu kahalang méga kulawu.

Tapi neuteup raray salira, nu cahayana ngadéséh cahaya purnama.

Nu gelenyuna ningtrimkeun kamelang nu kasawang dina awang-awang rasa.

Wengi harita...

Angin wengi nu nepak dada ngagulidag keun rasa trésna.

Bulan sapasi nu nyakséni urang gogonjakan sasarengan sapanjangna jalan.

Sumuhun leres pisan, salira nu sumuhun leres-leres mitrésna sim abdi.

Saupama kedah dipedar lalakon diri patepang salira.

Lega na sagara moal cekap pikeun salambar kertas na.

Endah na purnama moal cekap pikeun ngagambarkeun éndah na carita.

Sakedapan...

Urang sasarengan ngarahuh miceun kasieun.

Calik dina korsi kai, nyakséni layung nu ngagantung na awang-awang.

Neras silih cumarita ngumbar trésna jeung sono na sapanjang srangéngé tumurun.

Kalayan masihan uninga ka awang-awang yén urang dua insan nu silih pikahéman.

Lebah mana wanci nu salira suka.

Srangéngé nu lungsur luhureun sagara.

Peteng nu tengtrem ayem.

Atanapi medal na srangéngé lebah wétan.

Nanging salira teu kedah hariwang!, sim abdi jangji salawasna aya pikeun salira nepi ka perlaya.

Dalingding asih...

Salira nu katingal éndah wengi harita.

Nga bencar keun seuseungitan nu nyambuang sa waruga

Ngadalingding nalika bulan sapasi.

Duuh éndah na salira nu ngajaga sukma waluya.

Nu nyamur ku cahaya béntang gumiwang.

Lir sekar sawargaloka nu aya dina pangimpénan, ngalengkepan rasa trésna.

Rasa trésna nu leres-leres muga ngahontal kalanggengan.

Hariring éling ku haleuang nirmala.

Kataji jeroning peuting nu jempling.

Cahaya salira nyumirat jeroning peteng.

Ngajadikeun salira sekar raspati jeroning ati.

Dina wengi nu kacida jemplingna.

Ieu manah ngageter ningal imut na salira.

Gumujeng na lajeng tingkah paripolah na nu taya duana.

Neuteup salira nu ngaringkang keun ieu sajak.

Nalika sono ukur neda, muga tiasa tepang deui.

Wengi harita kacida jemplingna.

Peteng kalayan angin nu tinghiliwir ngusap dada.

Ngetrokan jajantung nu kapéngpéongan ku trésna na salira.

Ngusapan manah nu dipilampah minangka trésna nu ngagelebug.

Salira...

Wengi ieu sawios sim abdi sono kana wengi nu harita?

Ngimpleng tepang deui wengi ayeuna.

Muga nu kawasa maparin pituduh panglawungan keur lumangsungna urang ngumbar sono.

Muga salira ogé sono ka sim abdi.

Muga salira ogé émut wengi nu harita.

Kacida bungah na urang gogonjakan sasarengan sapanjang wengi.

Sim abdi sono unggal wanci.

Sono nalika urang paduduaan lir ratrikala jeung purnama.

Duh salira sim abdi sono...

- Karangmulya Juli 2024