CEUYAH POÈ BASA INDUNG DI SMANSAGUNG

Ku Iyan Cahyani, S.Pd.

(Tim Literasi SMA Negeri 1 Luragung) 

Basa indung téh mangrupa basa anu mimiti diwanohkeun ku nu jadi indung ka anakna.  Perkara ngawanohkeunna mah tangtu unggal indung béda-béda. Ngan nu jelas mah pasti basa nu mimiti dipikawanoh kunu jadi anak barang gubrag ka alam dunya téh nya taya lain basa anu sarua jeung indungna. Lamun indungna urang Jawa tangtu anakna diajaran basa Jawa, kitu deui lamun indungna urang Sunda pasti nya basa nu diajarkeun ka anakna basa Sunda.

Numutkeun data UNESCO, aya kana 90 nagara anu dimana éta étnis ngagunakeun basa indungna. Ari jumlah basa indung sadunia mah kurang leuwih aya 7000 , ngan saparona tina éta basa téh aya nu tumpur. Ari alesanna mah rupa-rupa. Kitu deui di Indonesia, teu jauh béda kaayaanna. Réa basa indung nu beuki kiwari téh kalah tumpur alatan teu bisa ngigelan zaman.

Ku kituna UNESCO, teu cicingeun. Keur nyingkahan pasualan ieu, tanggal 21 Februari ditetapkeun salaku poé basa indung sadunia atawa International Mother Language Day. Tarékah UNESCO ieu téh nu kudu diguratbadagan nya éta sangkan teu beuki loba basa indung anu kagerus ku zaman. Eksisténsina malah kudu bisa ngigelan zaman.

Di Indonesia mah malah basa indung téh diatur dina Perda No.5 taun 2003 dimana anu eusina ngébréhkeun ngeunaan pemeliharaan basa daérah. Mana di sakola-sakola ogé, basa daérah téh wajib diajarkeun. Ku diajarkeunna ogé réa siswa anu nganggap yén basa Sunda téh pangajaran anu kawilang hésé padahal dina emprona mah manéhna téh asli urang Sunda nu ti bareng lahir diwanohkeun kana basa Sunda ku indungna.

Di SMAN 1 Luragung nu letakna di kabupatén Kuningan Jawa Barat, basa Sunda téh disagédéngeun mangrupa mata pelajaran, ogé katitén pisan nerap dina kabiasaan-kabiasaan warga sakolana. Misalna waé bél mangsa lekasan pelajaran téh nganggo basa Sunda. Pon kitu deui, dina tanggal 21 Februari kamari diayakeun saruntuyan acara dina raraga ngareuah-reuah poé basa indung sadunia. Numana éta acara kacida ceuyahna  Nu jadi alpukahna mah nya taya lain kepala sakolana, Bapa Drs. H. Suleha, M.M.Pd anu kacida ngarojong pisan kana lumangsungna éta acara.

Dua minggu samémeh tanggal 21 Februari, Kepala Sakola SMAN 1 Luragung Bapa Drs. H. Suleha, M.M.Pd. ngariungkeun jajaran wakasék tur guru basa Sunda. Nu mana dina éta gempungan téh anjeunna netélakkeun yén dina poé basa indung téh kudu aya helaran étang-étang ngareuah-reuah. Nya tujuanna mah sangkan para siswa tambah reueus kana budaya jeung basana. Atuh éta instruksi téh kacida ditampina ku jajaran wakasék komo ku guru basa Sunda. Ningali pangrojong nu kalintang ageungna tinu jadi kepala sakola, nambah ngagedéan haté jeung ngagédéan harepan sangkan nyukséskeun éta kagiatan. 

Sakumna warga sakola ilubiung aub dina kagiatan ngareuah-reuah poé basa indung di Smansagung sebutan keur sakola SMAN 1 Luragung. Lain waé siswa gawé bareng jeung Osis nu bakal mintonkeun kamonésan kasundaanana dina éta kagiatan téh. Tapi jajaran guru jeung TU ogé teu éleheun. Sumanget para guru ogé teu éleh dina nyiapkeun pintonan. Dina hal éta pintonan rampak sekar nu mintonkeun 2 lagu nya éta lagu Basa Sunda cipt. Ubun Kubarsih jeung lagu Kuningan Tandang Maju Tanding cipt. Con Hasanudin, S.Pd.. Sumanget para guru ogé katitén tina sababaraha kali latihan anu kacida dariana. Najan aya sasakali anu kapaksa teu ngiring alatan teu damang. Tapi dina prungna mah kacida kompakna.

Dina prungna, total pintonan téh aya kana 12 pintonan. Nu mana mun dijentrékeun mah nya éta pintonan tim Karawitan, tim BSP (Bahana Suara Pelajar), Ngadongéng, Maca Sajak, Kawih, Rampak Sekar, Pupuh, Tembang, Anggana Sekar, Tari Jaipong, Drama Kaulinan Barudak, jeung Band Sunda. Atuh teu ceuyah kumaha. Para siswa ogé kacida éar jeung pada garogonjakan. Komo deui nalika bapa Drs. H. Suleha, M.M.Pd. salaku kepala sakola ngaprésiasi siswa nu mintonkeun maca sajak. “Alhamdulillah tiasa mintonkeun sajak judul Di Jero Torowongan yasana Ajip Rosidi, komo waktos bapa kepala ka payun tiasa ngaprésiasi atuh kacida reueusna” ceuk Rosy kelas XI IPA 1.

Ieu kagiatan lumangsung lungsur-langsar taya lain tina pangrojong nu jadi kepala sakola ogé gawé bareng tiap warga sakolana ogé tim pelatih. Kukituna aya harepan nu jadi gedé haté keur ka hareupna sangkan leuwih ngamumulé basa jeung budaya Sunda. Salah sahijina aya kahayang nu gedé ti para guru sangkan aya latihan rutin ka hareupna. “Cuang ngabentuk grup gamelan tim guru-guru sangkan kin nalika aya hajat sakola tiasa dipintonkeun” ceuk salah sahiji guru. Pamugi laksana pangharepan ieu. Aamiin….

Kanggo akang sareng tétéh anu panasaran kana ceuyahna kagiatan ngareuah-reuah poé basa indung di SMAN 1 Luragung hayu sakséni pintonanna dina chanel youtube : https://youtu.be/GcgcVKtm1ro. Hayu ditongton teras teu kénging hilap like and subscribe. Cag ah…