RELEVANSI TATAKRAMA SUNDA JEUNG ATIKAN AGAMA

Ku: Eulis H. Saputra

Bandung, 22/2/2025, Dina raraga Mieling Poe basa Indung sa-dunya (21 Februari) sakaligus mapag sasih Ramadhan 1446 H, Forum Muslimah Jawa Barat gawe bareng jeung Patrem (Sastrawati Sunda), ngayakan sawala religi nu tempatna di Pusat Digitalisasi Pengembangan Budaya Sunda Universitas Padjajaran Bandung.

Acara dilaksanakeun sacara langsung (off line) jeung teu langsung (on line). Ku kitu teh para pamilon nu ngiring aub teu kawatesanan ku nu di Bandung wungkul. Tapi oge ti daeran² lianna,malah aya nu ti luar nagri sagala.

Jejer nu jadi bahan sawala ngeunaan Relevansi Tatakrama Sunda sareng Ajaran Agama Islam dina Atikan Masyarakat.

Eulis Saputra, salaku pemateri wawakil ti Patrem ngabaladah ngeunaan konsep tatakrama Sunda pikeun kahirupan sapopoé nu kaunggel dina karya sastra Sunda, diantarana dina pupuh, kakawihan, pupujian, babasan jeung paribasa Sunda.

Pola pikir para luluhur  Sunda nu berbudaya tur agamis  linuhung dina  karyana.

Aya sababaraha konsep kautamaan nu patali sareng tatakrama (etika) Sunda pikeun panuyun laku prakna dina hirup kumbuh sapopoé.

Nyutat tina kamandang Prof. Dr. H.Yus Rusyana (budayawan Sunda), ngeunaan kagiatan pembelajaran, ku Eulis eta konsepna dilarapkeun tur dipatalikeun kana etika atanapi tatakrama Sunda,  nyaeta;

1. Tatakrama jasmani (misalna lungguh timpuh andalemi)

2. Tatakrama rohani (misilna paribasa jeung babasan: silih asah silih asih, silih asuh, clik putih clak herang, bobot pangayon timbang taraju, dibeuweung diutahkeun, leuleus jeujeur liat tali)

3. Tatakrama pancaindra (babasan: tiis ceuli herang mata)

4. Tatakrama dina kabahasaan (babasan: hadé gogog hadé tagog, basa mah teu meuli)

5. Tatakrama ka alam fisik (ngamanfaatkeun alam keur ibadah)

6. Tatakrama ka alam hayati (tutuwuhan, sasatoan) kucara henteu ngaruksak habitat alam henteu ngaganggu ekosistem: rea ketan rea keton

7. Tatakrama di masyarakat,(pupuh pucung : Utamana jalma kudu rea batur- keur silih tulungan- silih titipkeun nya diri-budi akal lantaran papada jalma)

8. Tatakrama dina budaya, ngajenan dina hal: pakasaban, peralatan, pangaweruh, tradisi/organisasi sosial, kasenian, basa

9. Tatakrama dina kahirupan beragama (toleransi beragama)

Dina enas²na, tatakrama Sunda ngasongkeun konsep hirup luyu jeung parentah agama nyaeta "Nyarek salah, nitah bener". ninggang dina paribasa "Ucap lampah poma salah, Salah buahna tugenah".

#sundapisan#