SUNDA TANDANG DI PAKUSARAKAN SOREANG

Ku: Eulis H. Saputra

(KACI/PATREM)

Kagiatan makena basa Sunda teh bagian penting pikeun ngahirupkeun rohang komunikasi jeung silaturahmi keur penutur basa Sunda di Jawa Barat mah. Boh ku cara lisan boh ku cara tulisan, misina sarua sangkan basa Sunda minangka basa indung tetep nanjeur, ngoncrang nyoara di buana tatar Sunda, di lemah pakusarakan sorangan.

Apresiasi pikeun Balai Bahasa Prov. Jawa Barat, nu geus hasil mere kasempetan pikeun para siswa, tandang dina raraga mulasara jeung miara basa indung. Ngagiring para nonoman, palaku basa Sunda, pelajar nu jadi pinunjul di 27 Kabupaten/ kota  ilubiung mintonkeun kaparigelanana tur kamonesanana dina make basa Sunda ngaliwatan Festival Tunas Bahasa Ibu 2021 jenjang SMP sa-Jawa Barat. Ieu acara tos lumangsung di Soreang ti kaping 7-10 Desember 2021.

Tujuan ieu kagiatan nya eta numuwuhkeun para nonoman generasi entragan anyar pikeun wanoh, bogoh tur mikareueus kana basa Indungna sorangan.  Pikeun terus dipiara, dimumule tur dipake dina pakumbuhan komunikasi di Jawa Barat nepi ka jaga.

Revitalisasi Basa Sunda berbasis sakola, dina widang pelestarian bahasa, sastra jeung pendidikan basa, dipiharep mampu ngajawab sagala kahariwang leungitna basa indung.

Kukituna, pikeun miara jeung ngamumule basa nu dianggap ampir tumpur, kagiatan-kagiatan kaparigelan basa Sunda kudu terus hirup nanjung sumebar nepi ka dipikawanoh ku masarakat Jawa Barat. Saha bae bisa muka rohang kagiatan pikeun mere luang pangalaman nu binangkit. Henteu ngandelkeun lembaga pamarentahan bae, nu tampolana jadi kasengker ku birokrasi administrasi.  Tapi, bisa mandiri tur silih rojong, ti mimiti para 'stakeholder' basa Sunda, nepi ka para palaku panyatur basana, tur dirojong ku dinas pendidikan kabupaten/kota

Festival Tunas Bahasa Ibu di Jawa Barat ieu, luyu jeung jejerna  nya eta ditujulkeun keur para sirung nonoman Jawa Barat. Siswa SD/SMP minangka sirung-sirung nu jadi andelan, nu bisa ngahirup-huripkeun basa Sunda ayeuna nepi ka jaga.

Momones jeung kaparigelan nu diadumaniskeun, dipintonkeun dina ieu gelaran pasanggiri ngawengku: maca sajak, maca dongeng, nulis jeung maca aksara Sunda, biantara, nembang pupuh, nulis carpon, sarta borangan (ngabodor sorangan/stand up commedy).

Sanajan tujuan utamana lain pikeun neangan jawara, atawa pinunjul tapi dina ieu kagiatan meredih kadariaan ti para pamilon festival enya-enya mintonkeun hasil diajarna, pikeun jadi conto punjul nu bisa jadi kareueus tur picontoeun dina ngolah tur ngokolakeun kaparigelan makena basa di sakola sewang-sewang.

Peuting panutupan kagiatan rempeg diluuhan ku para Kepala Balai Bahasa sa-Indonesia, jadi panyumanget keur para patandang nu midang.

Hiji kareueus keur Balai Bahasa Jawa Barat, bisa mitembeyan ieu kagiatan bari teu mengpar tina tugas poko jeung fungsina. Mayungan basa Indung nu aya di Jawa Barat jadi salah sahiji kaunggulan kinerjana. Bisa terus jadi conto keur panyatur basa Indung sejenna di Indonesia, anu euyeub, tur unik.

#KACIPASTIBISA#