PATREM

Ku: Eulis Saputra

Patrem, nami organisasi Paguyuban Sastrawati Sunda anu diadegkeun puluhan taun kapengker di Jawa Barat. Jinekna ngadeg 4 November 1982.

Salahsaurang panaratasna nya eta Ceu Popong/Dr. (HC) Popong Otje Djungdjunan.

Kamari, Saptu 5 November 2022 di Gedung Geugeut Winda UPI (kapungkur PKM IKIP), dina raraga milangkalana nu ka-40 taun, Patrem ngagelar rupaning pentas sastra dina wangun maca puisi, musikalisasi puisi, tarinisasi carpon, dramatisasi carpon sareng ngaji antologi Surat Penting Pustakawati (50 carpon karya petingan anggotana), nu dijejeran ku Prof. Dr. H. Yus Rusyana, Dr. H. Teddi Muhtadin, M.Hum., Dr. Ari Yogaiswara A, M.A., sareng Cecep Burdansyah, S.H., M.H.

Acarana basajan ti anggota ku anggota kanggo anggota, direuah-reuah ku para paminton karya,  mahasiswa Prodi Bahasa Daerah UPI.

Anggota Patrem ti taun ka taun ngarekahan. Sirung-sirung Patrem tumuwuh ti unggal daerah marengan kamampuh kreatifitas nulis para wanoja Sunda nu haat kana seni sastra, ancrub dina wadah organisasi kaSundaan.

Saestuna ieu organisasi teh dijenenganan Patrem ku Prof. Yus Rusyana, ngandung tujuan tur harepan sareng palsafah anu anteb maknana.

Seratan teh tiasa janten senjata nu seukeut. Para Sastrawati Sunda ngagaduhan simbol Imaji pikir katut rasa anu seukeut pikeun ngebrehkeun sakur pasoalan hirup tur kahirupan dina  seratan-seratan karyana tiasa maparin pangaruh ka sakur nu maca, lir  Patrem nu dianggo senjata.

Numutkeun Kamus Umum Basa Sunda, Patrem, asal tina basa Sanskerta nu hartosna pakarang sabangsa badi (pakarang sarupa peso nu gagangna cengkluk).

Kecap patrem tos lami ilang dina kancah gunem catur hirup kumbuh masarakat Jawa Barat sadidinten. Teu dipikawanoh  deui yen dina kamus kabengharan kecap basa Sunda kapungkur aya kecap patrem. Boa  ayeuna mah tos moal kaimpleng dina emutan oge, sumawonna dina fungsina moal arapaleun. Ongkohna deuih pakakasna oge  tos teu arang nu ngapimilik, kajabi ayana di para kolektor khusus pakakas senjata rupaning pepesoan.

Sanjata Patrem ayeuna tos teu diperyogikeun deui, tos langkung cocog dimuseumkeun.

Masarakat modern ayeuna ngageser kana senjata modern sanesna luyu sareng mesatna teknologi  pajamanan.

Ku organisasi sastrawati Sunda, ieu  Patrem dianggo janten simbol susuk gelung. Pamageuh sanggul wanoja supados teu udar, tetep ngagulung endah nambih geulis nu nganggona,

Anu tangtosna ngandung falasifah nu sae kacida.

Sagala nu aya di dunya keuna ku obah.  Jaman teras robah, pon kitu deui gerak budayana, nyaluyukeun sareng parobahan.

Ngindung ka waktu, ngabapa ka jaman.

Simbol Patrem oge tos teu janten susuk gelung deui.

Ayeuna ieu simbol nu dibentuk kembang malati teh dianggona diseumatkeun di luhur dada janten panitik/asesori raksukan kabaya upami aya gempungan organisasi. Sami ieu oge ngandung siloka. Mangga surahaneun deui.

Manjing dina yuswa nu ka-40, Patrem aya keneh dikieuna.

Prof. Ganjar Kurnia, DEA., dina pamapagna netelakeun Patrem minangka organisasi wanoja Sastrawati Sunda hiji-hijina sadunya nu teu weleh berkarya. Nu tetep nganteng nyangreudkeun silaturahmi anggotana  ku karya-karyana. Patrem motekar hurip hirup salaku organisasi mandiri di masarakat komunitasna.

Dina eta kasempetan ieu Profesor  manten rektor Unpad nu ayeuna janten Kepala Pusat Digitalisasi Pengembangan Budaya Sunda teh ngoleh-ngolehan ku karyana nu motekar ngarendonkeun judul-judul carpon dina antologi Surat Penting Pustakawati jadi hiji hal anu narik ati nu dijudulan " 50 Judul  Carpon jadi Puisi".

Sanaos tos sawawa, Patrem tetep keneh lir mojang nu lungguh timpuh andalemi, antieum nuturkeun jaman ku kabasajanana. Teu tipoporose ngudag strategi totorojolan hoyong sohor. Anatapi ngagubrag-gubrag pamarentah nyanggakeun proposal sumbangan.

Anggota Patrem gasik berkarya nyuguhan pecinta seni sastra.

Dina milangkalana nu ka -40 ieu teu katawis sumping pimpinan pejabat pamarentahan. Naha ieu kahanjakal atanapi pamecut kanggo Patrem sangkan langkung soson-soson ngalindekkan instansi pamarentahan?

Dina erongan visi misi penulis, jaga Karya nu bakal cumarita. Maparin kakayaan nu ngawarnaan sajarah budaya literasi, nu euyeub nu nilai-nilai linuhung, sumbangsih ti para sastrawati wanoja Sunda keur balarea, keur Jawa Barat nu dipikacinta.

Patrem tos nguniang, nyata karya anggota-anggotana.