"Serat Katineung"
Penulis: Robby Maulana Asyidik
Ilustrasi
Ku Robby Maulana Asyidik
Aya honcéwang
leuwih hérang manan béntang
ngalayang ting
baranang
aya katineung
leuwih ngenclang manan rumangsang
meungkeut pageuh
kamelang.
Jagat ngahibaran
sagara nu rongkah
ku kanyaah sirna
dipapag salaksa
malaikat
asa poék bumi alam
Susur-sasar,
rus-ras ka mangsa lawas
kala kasumba ku
katresna
tepung jeung
cimata, katineung, kalara.
Gebur indung
peuting diaweuhan kawih katineung
sora anjeun ting
haréwos ngadalingding ringreung
ngayun ngambing
sajeroning alam pikir
linglung
kapidangdung saban wanci nu patali.
Najan sagara
surud
najan wahangan
kiruh
anjeun tetep
ngadamaran juru kalbu
sumono dina
tungtung imut hanjelu
Peuting ahéng
satemenna
anjeun tayoh
ngalangkang ting kuniang
teuteup geugeut,
imut kareueut
sakotéap kari
bugang nu marakayangan
tapi anjeun geus
masinikeun
jeneng kukupu nu
nyiuman gulubur waktu.
Palangsiang pasini
urang katambias
mungguhing pupusti
‘na panyangking Hyang Widi
anjeun teu
palacidra
kaplak-kiplik teup
eunteup kumiceup
sumeleber ngagurat
rasa
meupeuskeun
kakangen nu gumelar saban peuting.
Ema, bapa, séwu
hampura
ieu diri gé apal,
urang geus atra aya nu boga
antara kuring nu
ngalalana kénéh di alam marcapada
anjeun nu aya ‘na
rangkulan Hyang Cipta.
Wilujeng wengi
nun sumuhun bari
apun
muga urang bisa
tepung jaga di Sawarga Maniloka.
—UPI, 20 Méi 2026
(ieu sajak kungsi
jadi pinunjul 2 dina calagara Nulis Sajak Riksa Budaya Sunda Tingkat Provinsi
Jawa Barat, nu di ayakeun di Universitas Pendidikan Indonésia Bandung)
Instagram kuring:
@robby.aksararasa
Tiktok kuring:
@robby.maulana
