KALAEDOSKOP PAMUNGKAS MANGSA (Pangwilujeng mapag taun 2022)

Ku: Eulis H. Saputra

(KACI/PATREM)

Panon poe geus surup muru kulon

Ngagilir pancen keur fajar meletek ti beulah wetan

Nyumorotkeun cahyana nu gumebyar nyaangan alam

Ngabageakeun taun anyar

Anyar dina itungan waktu  manjangkeun umur

Manjangan silaturahmi ka Alloh nu Maha Ghafur

Da, mungguh bulan jeung tanggal mah angger teu ngised tina pananggalan

Taun nu bakal disorang jadi taun pangharepan

Keur sakumna jiwa nu nyeungceum kahayang

Najan can nembrak

naon nu baris disanghareupan

Dalah implengan mah geus kasawang tina tarekah jeung lampah nu keur dilakonan

Aweuhan sora nganteur peuting pamustungan

Ngiderkeun do'a nu direka dina rumpaka kahirupan

Dina sela-sela sasalad nu can ingkah balilahan

Tumaninah ngalalana makalangan

Ngajak surti, numpi diri dina sumerahna raga jeung nyawa

Muka taun ku rupa-rupa kapentingan

Di Citembong narembongan pangharepan

Ngais aweuhan parerendeng jeung do'a kayakinan

Nu digalantangkeun dina saban renghapan

Ngetrukeun sesa  waktu

Inggis tinggaleun garapan

Rasa rumasa asa lulus mulus banglus

Ngaliwatan panjangna  mangsa 

Sedeng nu lian mah ukur  ninggalkeun catetan

Nuliskeun ngaran dina padung di pajaratan

Sujud pangharepan minuhan kebekna ati

Ditebar na paimbaran

Mayunkeun iman netegkeun kayakinan

Bruh- breh kalangkang sipatahunan

Nganteur raga dina rawayan kasatiaan

Mangsa nu geus karandapan

Disaput ku rasa syukur

Kacatet dina sajarah di kalanggengan

Gurat nu diukir dina pigura hirup

Ditebrengkeun dina layar angkeuhan

Sugan aya bagean piagam kasinugrahan

Pamaheut ati dina lambaran kertas nu ditandatanganan

Semet mana nu jadi udagan?

Geuning loba keneh pangharepan jeung implengan nu kudu diibadahan

Nu teu aya di sakolaan

Nu moal bisa diijazahan

(Leuwigajah, 1 Januari 2022)