PAPATONG KONÉNG

Ku Leni Yunia Daswati

(Guru SMKN 1 Sumedang)

Wanci haneut moyan di buruan imah papatong konéng tinggeleber eunteup dina dahan kembang keretas, sakedapan Adi neuteup papatong konéng nu ngeleter mawa lamunan ka mangsa anu katukang, mangsa puluhan taun nu geus kasorang kiwari kaguar deui, dina wanci nu sarua dilembur nu ayeuna jadi panineungan dirina, baheula basa indung bapa na masih araya kénéh mun wanci haneut moyan manéhna sok dlbawa nganteuran ku indungna ka sawah nu teu pati jauh ti imahna, di sawah indungna sok ngajak Adi turun ka kotakan ngala tutut nu naraplok di sisi galéng, Adi jeung indungna anteng ngalaan tutut, teu kungsi nepika tengah poé beubeunanganna geus aya saémbéreun, Adi jeung indungna tuluy hanjat ka luhur galeng, Adi mapay mapay galeng sawah nu disisina rajeg tangkal kalapa pendék nu lebeut ku buahna.

Beuteung karasa murilit ménta eusi, teu talangké indungna brak murak timbel bebekelan ti imah, tikajauhan bapana rentang rentang manggul pacul hanjat nuju ka lebah saung, dudukuy cetok jeung baju pangsi hideung nu dipaké ku bapana masih napel tina ingetan Adi, Pa Mardi bapana Adi ngumbah leungeun dina pancuran nu teu jauh ti saung, bangun daria naker rut rét ka Adi jeung ka pamajikan na, gék diuk dina bangbarung saung ngabaheuhay nyarandé kana tihang bari leungeunna ngageberan awakna nu karasa bayeungyang ku dudukuy nu tas dipakéna.

Song Ma Anih ngasongkeun timbel jeung deungeunna goréngan suuk, pais beunteur dibungkus kudaun cau, gesruk nyambel goang dina coét bekelna, lalab coél sambel saaya aya, seupan daun sampeu, daun gedang jeung daun katuk ditambah ku lalab atah daun kacang anu ngora meunang ngunder sisi galeng, puguh wé Adi jeung indung bapana dalahar ngalimed bangun nu ponyo pisan.

Bérés dahar Adi cengkat nuju palataran saung manéhna geus biasa néwakan papatong konéng nu rabeng areunteup dina tangkal katusba nu ngajajar sisi saung, papatong konéng tuluy diwadahan dina botol leutik bawaeun ka imah. Oléh oléh keur Ida babaturan ulin awéwéna.

Ida sok atoheun pisan mun dibéré papatong ku manéhna, papatong konéng ku Ida dikumpulkeun dipangrapetan tuluy  ditapelkeun dina hordéng jandéla kamarna jadi hiasan kamer sareng janten réncang mun badé bobo sok teras dipelongkeun ku Ida téh cenah.

Ida téh budak awéwé hiji hijina putrana Pa haji Sukandi guru ngaos di lembur Bunisari. Ida nyobat pisan jeung Adi salian ti batur sakola ogé kabeneran imahna padeukeut pisan, sok sanajan loba batur lalaki tapi jang Adi mah ulinna sok sareng nyi Ida waé, atuh pon kitu deui nyi Ida sapopoéna arang pisan ulin abring abringan jeung batur awéwéna.

Ibu Rosmala saréng Pa Haji Sukandi ogé indung bapana Adi  teu pati ieuh nyarék barudakna arulin babarengan da dianggapna barolon kénéh keun waé cenah da budak leutik asal aranteng waé, Ida jeung Adi maranéhna karék nincak kelas 4 SD.

Ti taun ka taun teu karasa duanana beuki gedé, geus naék ka kelas 6 SD sakeudeung deui bakal arasup ka SMP, ngan nya kitu gening lalakon hirup jelema usik, malik diatur kunu kawasa, hirup katungkul ku pati, maot teu nyaho di mangsa, basa rék tamat SD Adi dikersakeun kunu kawasa ditinggalkeun maot ku indung bapana, mimiti indungna gering panyakit gula, teu lila bapana nyusul maot alatan stroke Pa Mardi geubis ti kamar mandi nepi ka hanteuna, atuh pikeun Adi mah éstuning mangrupakeun ujian anu beurat pisan, ngan untung aya uwana, lanceuk bapana nu linggih di Bandung daék haat ngurus, ngarawat Adi nu pahatu lalis, tepi ka di modalan sakola SMP, SMA nepi ka ayeuna Adi bisa digawé bisa nyumponan pangabutuh sorangan, kanyaah uwana karasa pisan éstu clik putih clak hérang henteu ukur pupulasan, kabeneran uwana téh boga budak dua awéwé wungkul, basa mawa Adi kacida bungaheunna da hoyong pisan boga budak lalaki, Ayeuna sanggeus Adi sawawa manjing kana umur pikeun rumah tangga kanyaah uwana angger teu ngurangan,  sok sanajan Adi geus mandiri henteu gumantung ka uwana deui tapi uwana tetep merhatikeun Adi utama na mah masalah jodona, uwana kacida hariwangeunnana, komo deui umur Adi ayeuna geus teu bisa di sebut ngora deui geus nincak umur 40 tahun leuwih, lanceuk na mah nu duaan awéwé geus pada pada rumahtangga, imahna geus marisah.

Sanajan tacan rumah tangga tapi Adi geus boga imah sorangan, mobil Ayla kaluaran anyar geus bisa kabeuli ku manéhna, imahna di perumahan nu teu pati jauh jeung uwana di daerah Sarijadi, ku uwana Adi dicaram ulah misah imah tapi da keukeuh  cenah Adi hayang misah ngarah bisa mandiri teu ngabebannan ka uwana, atuh Uwa Istri sareng Uwa Pameget anu pangsiunan tentara ayeuna mah dibumina kantun duaan.

Ngan hanjakal, sakitu geus sagala nyampak Adi keukeuh can daék dititah rumahtangga,  uwana geus ngasongkeun sababaraha calon keur Adi, tapi Adi tetep nolak basana téh teu acan aya niat rumahtangga cenah, hoyong nyugemakeun heula uwa, tiasa bébas ngintunan artos, étang étang mulang tarima ka Uwa anu parantos ngabiayaan Adi ti awit Adi lebet SMP dugika tiasa mandiri sapertos ayeuna. ***

Gebeg lamunan mimiti buyar ras inget ka Ida, enya Ida batur ulin keur leutikna dimana manéhna ayeuna? Gap leungeuna kanu HP tuluy néang Aplikasi Facebook ramo na ngusapan layar HP curukna lincah nulis ngaran Ida Rosdiani, klik curuk neken lambang pamaluruhan,  bray dina layar HP kaluar sababaraha ngaran nu sarua , Adi ngahuleng rék milih ngaran nu photona cocok jeung rupa Ida bari memori uteukna nganjang ka puluhan taun katukang, ngira ngira rupa Ida siga kumaha ayeuna?

Curukna nunjuk kanu ngaran nu aya photoan awéwé geulis maké cindung kayas, moal salah ieu Ida téh gerentes dina haténa. Klik curuk diantelkeun kana layar HP, bray photo profile Ida dihandapna ngabérébét photo photo selfie manéhna, Adi rada reuwas palebah maca tulisan status Ida cenah photo kenangan dihandapna photo Ida jeung hiji lalaki, panasaran klik koméntar na dibuka, eusina pada ngupahan majar téh sing sabar jeung tabah narima cocoba, mun dilenyepan tina koméntar sobat sobat jeung kenalan  facebookna nyimpulkeun yén Ida kakara sababaraha bulan ditinggalkeun maot ku salakina.

Peuting na Adi gulinggasahan teu kawawa ku rasa panasaran hayang nyaho kaayaan Ida ayeuna nu sabenerna, terakhir Adi menang béja yén Ida geus rumahtangga kawin ka urang Ciamis, ti harita kadieu Adi teu apal kahirupan Ida satuluyna.

Gap deui Adi nyokot HP tuluy muka aplikasi Facebook klik muka deui dingding status Ida , Adi nyoba ngirim pesen kanu messenger Ida nu eusina, Assalamu'alaikum wr wb.punten tumaros dupi ieu leres Ida nu kawitna ti Bunisari Majalengka ? Pung pesen diapungkeun, heuleut sababaraha waktu taya jawaban. Sok hp ditunda luhur méja, leungeun Adi nyokot remote TV, mindahkeun chanel ka berita panganyarna, teu lila tring hp disada, rikat di cokot bray deui muka messenger kabaca aya jawaban ti Ida muhun leres dupi ieu sareng saha ?

Dijawab deui ku Adi Ieu abdi Adi, masih émut henteu ? Jawab Ida kantenan émut pisan, kumaha damang Kang Adi, tayohna Ida geus mukaan photo profil manéhna, Adi ménta no WA Ida, satuluyna maranéhna uplek ngobrol dina WA nyaritakeun kaayaan séwang séwangan, dapuguh sobat ti leuleutik jadi teu hésé deui obrolan maranéhna langsung loma pisan, malah tuluy jangjian papanggih kabeneran Ida sok mindeng ulin ka Bandung, ka ibina nu aya di Cihampelas, da ibu ramana Pa Haji Sukandi sareng Ibu Rosmala mah tos lami ngantunkeun, tinu rumahtangga jeung salakina nu ti heula Ida teu acan batian, ari ayeuna Ida cicing di Banjar di imah menang mangmeulikeun salakina,  sapopoé Ida ngajar ngaos di TPA ngan tisaprak aya sasalad Covid barudak nu ngaos gé diliburkeun, Ida sok mindeng ulin ka Bandung babantu ka bibina nu gaduh toko ageung grosir sembako, lumayan sagawé gawé keur panyambung hirup.

Hubungan Adi jeung Ida beuki layeut, malah Adi gé tos ngenalkeun Ida ka uwa, diwartoskeun yén Ida téh sobat dalit manéhna ti keur leutik tatangga ti Bunisari, Uwa Istri kacida pisan bungaheunana, hayang geura némpo Adi rumahtangga cenah uwa téh geus kolot geus hayang mangku incu budak Adi.

Cunduk waktu ninggang mangsa Adi Rusdiana resmi jatuk rami jeung Ida Rosdiani, sanajan nudatang teu pati loba kulantaran keur usum sasalad téa tapi henteu mangaruhan kana khidmat na acara walimahan nu jadi wali awéwéna lanceuk Pa Haji Sukandi uwana Ida, anjeuna diangkir ti Majalengka dijemput ku Adi pi tilu poéeun rék dirapalan, dipiwarang mondok di Cihampelas.

Pangantén Istri didangdanan meni rancunit pisan pon kitu deui pangantén lalaki nugandang lir raja jeung ratu sapoé éstu pasangan anu payus pisan néng Ida jeung cép Adi téh, nu ngahadiran meni marolohok kataji ku kageulisan néng Ida, sajabana ti geulis rupa téh néng  Ida mah kasipuh ku lungguh timpuh andalemi, hadé basa, tata, titina, kukuh pengkuh ngagem atikan agama. Kitu deui cép Adi jajaka gandang nu gedé wawanén , tanggungjawab jeung wibawa, tara pisan nyieun codéka , leket agamana kapercaya jadi ketua DKM dilingkungan perumahanna.

Saba'da resmi ngahiji Ida diboyong ku Adi ka imahna di Komplék Perumahan Sarijadi, teu karasa geus sabulan leuwih basa Ida ngajak Adi ka dokter harita kudokter disebutkeun yén Ida kakandungan , teu ka catur bagja na Adi komo deui Uwa Istri mah nepika tuluy syukuran ngabagikeun sangu konéng katatangga na, ti bulan kabulan kandungan Ida beuki gedé , beurang peuting manéhna tara kaliwat maca surat Maryam komo sanggeus di USG apal orok téh ceuk dokter piawéwéeun , ngaji jeung dzikir kitu waé pagawéan Ida sapopoéna téh, atuh nya kitu deui Adi beuki getol indit ka masjid unggal sholat tara tinggaleun berjamaah di masjid boh waktu di kantor atawa diimah.

Qodarulloh nincak salapan bulan kandungan Ida, awak Ida karasa panas meni nyebrét, dada sesek, nafasna rénghap ranjug bangun eungap pisan, Adi gancang mawa Ida ka rumah sakit henteu hilap nelpon Uwana  ngawartosan kondisi Ida nu saperti kitu, nepika rumah sakit dokter rikat mawa Ida karuang bersalin sanggeus dipariksa ku dokter ahli kandungan hasilna cenah orok kudu buru buru dikaluarkeun kujalan dioperasi sabab kahiji lantaran geus manjing salapan bulan kaduana indungna nyaéta Ida positif keuna Corona, atuh gebeg téh Adi reuwas pisan ngadéngé béja kitu ti dokter téh. Manéhna tuluy indit ka masjid seja ngadegkeun sholat Tobat dua roka'at, bari sujud sumerah diri kanu kawasa muntang tulung kanu Agung sangkan dibéré jalan nu hadé ti Pangéran keur anak jeung pamajikanana.

Réngsé sholat jol aya perawat datang ngasongkeun kertas tandaeun nu eusina persetujuan tindakan operasi caesar, teu talangké gutrut wé Adi nandatangan surat, song dibikeun ka perawat, perawat manggut bari pok nyarita cenah pihak médis bakal berusaha semaksimal mungkin pikeun nyalametkeun orok jeung Indungna, ku Adi dihaminan bari panon carinakdak.

Sup perawat asup karohangan Operasi sedengkeun Adi , uwana jeung bibina Ida mah narungguan di luar bari  babacaan sabisa bisa ngadu'akeun Ida jeung orokna sangkan salamet.

Selang satengah jam dokter nu saged maké APD lengkep kaluar bari paroman semu nguyung, pokna nyarita kami sudah berusaha tapi Alloh berkehendak lain, bayi selamat tapi ibunya meninggal.

Leung tetempoan poék mongkléng les Adi kapiuhan teuinget dibumi alam.

Sadar-sadar harita geus aya di imah uwana. Adi istighfar tuluy nanyakeun dimana layon Ida jeung orokna ?

Uwana ngajawab layon Ida geus dipulasara ku pihak rumah sakit tuluy di kurebkeun dikomplék pemakaman umum maké protokol kesehatan Covid nu ketat teu meunang dihadiran ku sasaha kajaba ti petugas ti rumah sakit kitu cenah jawaban uwana, ari orok masih aya di rumah sakit di ruang perawatan bayi, Alhamdullilah séhat cenah.

Adi teu bisa nyarita nanaon haté na peurih lir digerihan hinis, teu karasa cipanon ngeclak maseuhan pipina ras ka diri nu kakara manggih bagja kiwari kudu nandangan tunggara, Ida nu dipikacinta kiwari geus miang ka alam kalanggengan miheulaan manéhna ninggalkeun buah katresna duaan, orok awéwé kacida geulisna ku Adi di ngaranan Malati Kembang Katresna.***

Ter...papatong konéng ngeleter eunteup dina dahan kembang keretas, dina wanci nu sarua wanci haneut moyan lamunan Adi mimiti buyar kasadarkeun ku sora budak nu nyalukan Ayah...Ayah...hayu anteur Mala hoyong ameng ka teun enin...cenah budak awéwé umur tilu tahun nu teu apal dirupa indung kiwari jadi panghibur kalaraan dirina.

Ayah nuju ngalamunnya ? Gebeg Adi ngagebeg, gabrug budak ditangkeup, dipangku digaléntoran bari cipanon merebey maseuhan pipina.

Pileuleuyan jungjunan kiwari ngan papatong konéng nu salawasna satia marengan lalakon hirup akang, gerentes Adi pinuh nalangsa.***

Tamat