TAPAK DO'A DI ROHANG KELAS

(Panineungan ka Alm Hj.Lilis Suartini, M.Pd, guru PPkn SMPN I Cimahi)

Ku: Eulis H. Saputra

Dinten ieu, pancen anjeun tos lekasan

Sagala lara nu karandapan tos dipungkas

dibunian, dirurub ku kaen bodas

ti dampal dugi mastaka

Citangis nu ngagendang na kongkolak soca

Teu wasa ragrag

Ngan ukur ngalimba dibarung dunga

Ngajajap semet buruan rasa

Ras émut,

nalika anjeun ngadeg di batas gerbang sakola

Ngabagéakeun sakumna siswa ku salam sapa

Ngawuruk siswa disiplin sangkan tangginas sumping

Unggal enjing nu pinuh niat,

anjeun sok sumping bari nyimpen doa

Seuri anjeun janten panglipur,

sanajan dina hate aya capé nu teu kasaurkeun

Urang tos puluhan taun meuntasan waktos sasarengan

Nyandak rupi-rupi kawangi carita nu rébo ku pangabdian

Aya kalana seuri babarengan,

aya kalana cimata padungdengan nu ditahan dina sujud peuting nu tingtrim

Kamari pisan anjeun ngalanglang sabar,

Sanés ku kecap nu panjang,

tapi ku cara nampi sagala ujian

Napakuran titipan ti Gusti Nu Maha Welas tur Heman

Dinten ieu anjeun nilar dunya

Ninggalkeun tapak dunga di rohang kekas

Ninggalkeun abdi sadaya

Ninggalkeun sagalana

Seja umadep

ka Nu Maha Kagungan sadaya

Mugia unggal léngkah anjeun

dicatet janten amal nu teu pegat,

jantwen cahaya di alam kalanggengan

Jiwa-jiwa nu biasa patarema

ngarumat panineungan dina do'a

Léngkah anjeun  ngajar kalayan ikhlas tur daria

ngabdi ka nagara mugia janten ibadah anu mulya

Sabab pisah lain tungtung nu taya makna

tapi pasrah dina ridho-Na. 

Insya Alloh, husnul khatimah