TSUNAMI KAPATI-PATI

Oleh Eulis H. Saputra

(KACI/PATREM)

Laut ngagimbreung di lemah kadeudeuh

Ratusan rebu jiwa ginggeung neang pamuntangan

Ngeumbingan alam nu dileled ku bedahna galura samudra

Harita, bedah rebuan cimata ngadunya

jumerit na  rasa nu ngabuana

Sarawu do'a nu dipulasara

Dinangna nengne na rohang dada

kasadrah jeung kaikhlasan

Geuning,  papasten geus tiba ti ajalina

Rasa jeung jiwa ngahijikeun kayakinan

Nengetan bacaeun nu balatak di jabaning alam

Di darat,

Di laut

Jeung di jomantara

Sora-sora reang ngahariring nafakuran

Nyaliksik kahirupan nu kauger ku aturan

Meuseuh memener pikir dina kungkungan waktu nu geus tangtu

Nyungsi elmu catoneun keur nu kaleleban

Tsunami nungtun ati sangkan surti

Miwulang raga anu tunggara

Ngajak pikeun ngolah rasa jeung jiwa

Matemakeun karohanian jeung kamanusaan

Ngagiring lengkah ngudag karidhoan

Leuh, geuning karasa hengkerna

Kabagjaan nu geus disakuan

Loba keneh nu can kamaknaan

Tsunami mere janji dina ati

Ngajak surti nepi kapati

(Leuwigajah, 26 Nov 2021)