SAUNG LITERASI CUKANG LANTARAN SMA NEGERI 1 CIPONGKOR NGAWUJUDKEUN SAKOLA DESA PRESTASI KOTA

Sangian Ganjar Permana 

(Salah Sawios Guru Mata Pelajaran Seni Budaya SMA Negeri Cipongkor)

Kiwari di SMA Negeri 1 Cipongkor aya bangunan nu endah tur tohaga nyatana hiji tempat nu aya sabudeureun lapang pernahna ditungtung belah kaler payuneun kantor pupuhu sakola, nyatana saung anu ilaharna disebut gazebo. Ari gazebo teh nyaeta basa deungeun tina kecap gaze (Inggris) artina nempo, jeung ebo (latin) ka luar, lamun dihartikeun sacèrèwèlna na mah nempo ka luar.

Dokumentasi poto Bapa Iman Budiman, M.Pd

Gazebo ilaharna dijeun hareupeun tepas imah, taman atwa di teras tukangeun imah. Bisa oge di gigireun kolam renang pikeun jadi papaes di eta tempat. Ari dijieuna mah basajan mung aya unsur seni sacara artistik supaya sieup tur katingali nyeni, mantes jeung endah, saè na mah sena ngageblang ngan tong leuleuwiheun. Salah sahiji tujuan tina saung/gazebo teh diantarana tempat pikeun leleson, sangkan genah tur tumaninah ningali patempatan di luar.

Mun nalungtik kana kasang tukang ti beh dituna, gazebo baheulana arsitektur eropa, anu sok disebut masion ( imah gede ) para bangsawan, anu diriung ku taman, kolam, air mancur jeung nu lain na. Ari nurutkeun basa indung mah ( basa sunda ) saung teh nyaeta hiji tempat ngiuhan atwa imah leutik nu ilaharna sok aya di pasawahan, dikebon, dihuma/pasir atawa di hiji tempat nu jauh ti imah. Nurutken Kamus Besar Basa Indonesia ( KBB ) saung = gubuk, rumah kecil.

Diadegkeunana saung/gazebo di SMA Negeri 1 Cipongkor lain ngan saukur keur tempat leleson jeung artistik hungkul tapi aya sawatara fungsina nu baris di kapayunkeun, diantarana nyaeta :

1.         Sarana penunjang kana kagiatan belajar

Saung/gazebo anu di wangun di palataran lapang SMA Negeri 1 Cipongkor bangunanana lega, nyaman ogè ku ayana udara anu sejuk, ku kituna ieu saung teh manfaat tiasa ngabantos kanggo peserta didik sangkan leuwih macakal tur hasil pamaksadanana.

2.         Tempat ngerjakeun tugas

Peserta didik laluasa ngerjakeun tugas boh sewang-sewangan atawa kelompok sabab tempatna lega, hampar tur aya amparan oge utamina aya colokan/stop kontak janten tiasa ngabantos kanggo ngecas laptop, hp oge masang pasilitas sanesna kanggo media belajar.

3.         Tempat leleson/istirahat, santai

Pangais pangatik oge peserta didik tiasa ngalungsar bari leleson tina akrivitas sakola, sangkan aya tanaga ogè ngaluangkeun waktos pikeun ngahening pipikiran.

4.         Tempat gunem catur jeung gotra sawala/berdiskusi

Salah sawios aktivitas gunem catur/ngobrol, ogè gotra sawala/berdiskusi, debat pastina raos margi tempatna iuh, lega oge sejuk. Sok komo mun aya angin nu ngahiliwir matak waas tur kagagas kana pikir ngalantarankeun raos manah raos emutan, raos ngobrol sambil liron pamadegan.

5.         Fasilitas karancagèan/penyalur kreativitas

Peserta didik anu gaduh kreatif sareng produktif biasana ngabutuhkeun suasana jeung tempat anu nyaman supados kengeng inspirasi, sabab ku ayana ieu tempat bisa ngahasilkeun ide-ide anu kreatif nu balukarna gaduh emutan anu cemerlang. Oge nu gaduh karancagean dina hal seni tiasa ngabantos bari sambil latihan.

6.         Tempat observasi

Ku ayana aktivitas oge kagiatan di sakola nu kacida reumbeuyna ieu tempat tiasa kanggo observasi, saumpana sambil ngantosan guru-guru nu bade ngawulang, atanapi guru nu bade lebet ka kelas sambil ngalamgkung tiasa calik heula tur reureuh sakedap.

7.         Tempat Silaturahmi

Kempel ngariung sasarengan ngajadikeun keluarga besar SMA Negeri 1 Cipongkor langkung nganteng tali duduluran oge mimitraan diantara sadayana.

8.         Tempat Balakècrakan

Suasana anu ngadukung ngajadikeun saung raos kanggo tuang ngariung/ botram sasarengan, ku ayana tempat anu nyaman bari hawana sejuk teu matak harudang.

Nu jadi kaunggulan tina saung nu aya di SMA Negeri 1 Cipongkor mah nyaeta pikeun peserta didik bisa diuk mando, ngempel ngariung tur babarengan nambahan elmu pangaweruh salah sawiosna bari maca, matak ieu saung teh di ngaranan Saung Literasi. Anu di resmikeun ku salah sawios pupuhu SMA Negeri  1 Cipongkor nyaeta Bapak Drs. Adi Sumiarto, M.Pd dina kaping 17 Juli 2019.

Sateu acan diresmikeun ku nami saung literasi, kantos aya usulan nami sejen ti salah sawios pangais pangatik SMA Negeri 1 Cipongkor nyatana Bapa Hj. Yadin Sehabudin, M.Pd, anjeuna nyangem kango nganamian eta saung ku nami Saung Adi Sumiarto supados janten nganteng di emut ku balarea kana jasana oge janten kenang-kenangan, Mung Bapak pupuhu waktos harita teu sapagodos sareng pamadegan Pa Haji. Anjeuna ngajentrekeun yen eta saung teh milik salarea jeung pikeun balarea, nu tiasa digunakeun tur dimanfaatkeun ku sadayana warga sakola, tong di namian ku nami pribadi. Nu ahirna saung nu tos beres di adegkeun waktos harita, cunduk di namian Saung Literasi.

Bapa Adi  Sumiarto gaduh harepan kapayuna ieu saung teh tiasa jadi salah sawios cukang lantaran majengna sakola ku ngagalakeun budaya literasi. Siga nu atos terang kapayuna, tur gaduh sawangan pikahareupeun dina wangkid ayeuna sa atosna Bapak Adi Sumiarto  mungkur ngalih ka SMA Negeri  1 Ciwidey, kahoyong sareng harepan saolah-olah di cumponam saur paripaos tea mah asa mobok manggih gorowong, asa meuntas dipapag cukang, gaduh pamaksadaan hatur kapiunjuk, ku pupuhu sakola nu enggal nyaeta Bapa Saepul Muhtadin, S.Pd gaduh program Gerakan Litetasi Sekolah anu sok di singket ku bahasa Gelis.

Luyu tur payus gaduh tempat Saung Literasi di resmikeun ku pupuhu sakola nu lami anu teras di lajengkeun ku program pupuhu sakola nu enggal. Ku ayana kitu tiasa ngaheuyeuk, saigel sapihandean janten di SMA Negeri 1 Cipongkor gaduh kaunggulan dina widang literasi. Budaya literasi ngajantenkeun warga sakola macakal dina widang elmu pangaweruh, margi luyu sareng babasan dina basa sunda “Buku teh gudangna elmu, maca minangka koncina”. Janten lamun urang hayang nambah elmu, nambah wawasan kudu daek sareng seueur maca.

Ku kituna ka sadayana wadia balad pangais pangatik SMA Negeri 1 Cipongkor hayu urang sukseskeun program  Gelis ( Gerakan Literasi Sekolah ) nu atos dipapadonkeun ku pupuhu sakola SMA Negeri 1 Cipongkor Bapa Saepul Muhtadin, S.Pd sangkan ningkat pangaweruh, tambih elmu, tambih pangalaman tur tambih katiasa.

Mugia ku ayana tempat saung literasi diteraskeun ku program Gelis ( Gerakan Literasi Sekolah ) ngajantenkeun sakola hirup, tur hurip, ngahontal prestasi nu pada ahirna ngawujudkeun cita-cita SMA Negeri 1 Cipongkor nu diluluguan ku Bapa Saepul Muhtadin S.Pd nyaeta Sakola Desa Prestasi Kota. Mugia ieu kecap sareng bahasa teh tiasa tinekanan tur cunduk diparengkeun ku allah s.w.t diijabah, sanaos sakola dilembur urang kedah gaduh pinujul tur kamashur.

Sateu acan simkuring mungkur tina ieu seratan, simkuring bade ngutip seratan ti salah sawios ahli bahasa nyaeta Bapa Iman Budiman, M.Pd anu sangemna : “ Sebelum kita menanamkan kegiatan berliterasi pada siswa, kegiatan literasi tersebut harus sudah melekat dalam diri kita “.  Anu pihartoseun nana urang salaku guru kudu nyieun conto nu nyata, kudu jadi teladan, kudu bisa jadi guru nu dikiratakeun digugu jeung ditiru. Cindekna saur paripaos dina basa arab kedah Ibda binafsi nu hartosna kedah ngawitan ti diri urang nyalira, insya allah pami urang tos ngawitan diajar pasti nu sanes tiasa nurutan. Mugia sakola urang tiasa nyongcolang ku prestasi tur unggul dina widang literasi. Cag dugika dieu sim kuring seja mungkas ieu seratan.

Wallau A’lam Bishawab.