TINA OBROLAN JADI TULISAN (Nulis Minangka Kabutuhan Hirup)

Ku: Eulis Saputra

 

'TREM PATREM, trem Patrem...

Paguyuban Sastrawati Sunda

Perlambangna kahormatan diri

Perlambangna kakuatan diri

Ciri wanoja Sunda sajati

 

TREM Patrem, trem Patrem

 

Paguyuban Sastrawati Sunda

Nembus tembus (ka)na mamaras rasa

Nembus tembus ka lulurung mangsa

Tapak wanoja Sunda sajati

 

Diasih

Diasah

Diasuh

Diseukeutan (di)na tulisan

 

Ngotretkeun

Kamampuh

Nu tanggoh

Nyoarakeun tangtungan ajen.

 

Poe Sabtu, 8/11/2025, ieu karatagan Patrem ngagalindeng di Gedong Pusat Budaya Sunda, Univeraitas Padjajaran di Jl. Dipati Ukur Bandung, jadi pananda bubuka acara Patrem (Paguyuban Pangarang Wanoja Sunda) 

Teu karaos waktos  mapay na saban taun ti awit 4 November 1982 dugi ka taun ieu 2025, PATREM Panceg  dina yuswa wanoja dewasa nu ka-43 taun.

Ngagelar silaturahim kalayan diwewegan ku mini dialog ti para panyatur nu ahli dina widang tulis tinulis. Aya sastrawan, budayawan senior (Prof. H. Yus Rusyana, Aam Amilia, Abdulah Mustafa, Tatang Sumarsono, Cecep Burdansyah, Dian Hendrayana, wartawan, penerbit (Rahmat Taufik) tokoh-tokoh nu marajian ngadegna PATREM (Ambu Yooke Cuparmah, Ceu Popong Otje Jungjunan) jeung wawakil ti muslimah Jawa Barat, Dr. Caria saparakanca.

Sanes heuheureuyan kanggo hiji organisasi tiasa ajeg aya keneh dugi ka puluhan taun. Ieu téh prestasi anu henteu joré-joré.

Patrem teu euyeub ku pamuji atanapi piala, tapi PATREM aya dikieuna ku alatan para anggotana nu satia miboga rasa anu sarua. Resep nulis ajangeun balarea.

Anapon tulisanana teu sadaya pinunjul teu janten bangbaluh, da niatna ogé pikeun ngasah kamampuh ngébréhkeun peta kabasaanana dina wangun tulisan boh fiksi boh non fiksi, bari mageuhan silaturahmi.

Upama aya anu ngaapresiasi tiasa dimuat di salah sahiji media boh surat kabar atanapi majalah, tangtosna ieu jadi kareueus keur anggota Patrem kuanjeun.

Apanan aya waktuna nalika nulis téh lain saukur nyusun kecap, tapi cara pikeun nyumponan kabutuhan jiwa.

Pikeun sabagian jalma, nulis téh ngan ukur ngébréhkeun pamikiran,  tapi pikeun anggota Patrem anu geus ngarasakeun jero na pangalaman hirup, nulis téh saperti napas, kudu aya jengglénganana supaya hirup karasa lengkep.

Hal ieu pisan anu diupayakeun ku para anggota Patrem nepi ka ayeuna.

Mungguh keur nu boga ketak nulis mah, nalika urang nulis téh, saéstuna  urang keur nyarita jeung diri sorangan. Aya rasa nu teu kungsi kapanggih dina obrolan, tapi bisa kapanggih dina kalimah nu urang tulis.

Nulis ngajarkeun urang jujur, ngajarkeun urang ngaku yén dina diri aya rasa, aya salah, aya kahayang, aya kehemeng,  jeung aya pangampura.

Unggal kecap anu mucunghul téh siga eunteung nu némbongkeun jerona haté. Tampolana, urang manggihan deui rasa syukur nu leungit, atawa manggihan deui harti tina kahirupan anu basajan.

Nulis téh lain ukur pikeun dibaca ku batur, tapi pikeun ngadéngékeun sora batin sorangan.

Dina éta prosés, urang diajar ngarti, diajar ikhlas, jeung diajar hirup kalayan sadar yén sagalana téh titipan Gusti.

Ku kituna, nulis téh jadi jalan pikeun ibadah meresihan jiwa. Sanajan ngan sababaraha kalimah, lamun ditulis kalayan haté, éta bisa jadi panglipur jiwa pikeun rasa nu teu kapanggih ku kecap.

Pikeun Patrem nulis téh lain beban, tapi kabagjaan.

Lain kawajiban, tapi kabutuhan.

Sabab dina unggal gurat kecap, aya kahirupan nu hayang dicaritakeun, aya rasa nu hayang ditafakuran jeung aya jiwa nu hayang pinuh ku cahaya.

Udagan Patrem, teu marakela. Lir ibarat ngalirna cai di walungan anu endah, asri tur mawa tingtrim,  ngamalir  malidkeun rasa anu basajan tapi ngocor mere nafas jiwa dina golontorna kahirupan.

Saha anu haat tiasa ngangkat nanjeurkeun kamulyaan niat ieu para wanoja?

Nya tangtuna saha baé nu aya diluareun Patrem atanapi para Apresiator téa. 

Para tokoh Sunda, budayawan, Sunda, Para Pangarang Sunda, Redaktur Media cetak jeung digital koran atawa majalah, Pimpinan televisi lokal, atanapi radio, leuwih jauhna masarakat jeung Pamarentah Jawa Barat, katut dinas-dinas terkait liannya.

Éta sadaya bisa méré andil pikeun hirup huripna ieu para pangarang wanoja Sunda

Ngaliwatan karya anu dimuat dina rupa-rupa media, sacara teu langsung milu ngawanohkeun anggota Patrem dina mekarkeun karancagéan nulisna.

Sanajan henteu sadaya anggota teu acan lebet kana kategori sastrawati anu bergengsi nu layak mibanda prestasi "Nobel", Henteu janten alit manah, henteu janten mugagkeun lengkah. Apanan unggal apresiator oge mibanda kaweruh jeung kamampuh anu béda-beda. Henteu sadayana ahli dina basa.

Karya jeung tarekah anggota Patrem kiwari nu dipimpin ku Prof. Dr. Chye Retty Isnesdes (Ketua), Dra. Eulis H. Saputra (Wakil Ketua), Hena Sumarni, M.Pd. (Sekretaris) Sri Teti, M.Pd. (Bendahara), narekahan ngajembaran ambahan lengkah garapan Patrem pikeun kamanfaatan ka balarea.

Ngalangkungan Pasasa (Patrem Saba Sakola), Papasa (Patrem  Paguneman Sastra), Patrem sacara mandiri bari resep nguriling ka saban sakola pikeun ngipuk minat jeung bakat siswa ngalangkungan literasi Sunda.

Ngajak tur ngawanohkeun barudak sakola, utamina siswa SMP, SMA/SMK, salaku masarakat Sunda nu minat tapi teu acan wanoh pisan kana jujutan karya sastra Sunda, pikeun boga karep nulis. Nu utami nyipta bacaan nu bisa ngawakilan rasa basana kalayan bisa méré kanikmatan jiwa keur anu macana.

Mugia ieu tarekah ginulur bagja, ngawujud tur seueur manfaatna. Ngahudang para apresiator anu bakal jadi promotor lahirn a para pangarang Sunda lianna.

Sanes mung semet wangkongan tapi enya jadina dina aksi anu nyata.

Luyu sareng visi misi Patrem nu kaunggel dina lagu karataganana.

#PATREMAYA#